सगरमाथाको चुचुरोमा विवाह

२०६२ जेठ १९ बिहीबार

सगरमाथाको चुचुरोमा पुगी नयाँ नयाँ कीर्तिमान राख्ने क्रममा काठमाडौं नेवार समुदायकी मोनी मुलेपति र सोलुखुम्बुका पेम्बा डोर्जी शेर्पाले सगरमाथाको चुचुरोमा नै विवाह गरी सबैलाई अचम्ममा पारिदिएका छन् ।
मोनी गैर शेर्पा समुदायबाट सगरमाथाको सफल आरोहण गर्ने पहिला महिला हुन् । उनीहरुले गएको सोमबार नै सगरमाथाको सफल आरोहण गरेका थिए । तर बिहेको खबर भने आज उनीहरु काठमाडौं नफर्केसम्म कसैलाई थाहा थिएन । उनीहरुले आफ्नो योजनालाई यति गोप्य राखेका थिए कि सँगै आरोहण गर्न गएका सोही आरोहण दलका सदस्य कामी शेर्पालाई पनि त्यसको अत्तोपत्तो थिएन । कामीले आज काठमाडौंमा पत्रकारहरुसितको कुराकानीमा भने, मलाई शंका त लागेको थियो पक्कै बिहे गर्नलाई नै होला भनेर । तर म निश्चित थिइनँ ।
घर परिवारलाई त उनीहरुले यसको बारेमा कुनै सुँइकोसमेत दिएका थिएनन् । पेम्बा डोर्जीले भने योजना असफल भयो भने त अन्तर्जातीय विवाह भएकोले घर परिवारमा गार्‍हो हुने भएकोले हामीले कसैलाई यसबारेमा थाहा नदिएका हौं ।
आज उनीहरुलाई लिन गएको एउटा हेलिकप्टर सगरमाथा आधार शिविरमा दुर्घटना भएको थियो । हेलिकप्टर क्षतिग्रस्त भएपनि भाग्यले कसैको ज्यान भने गएन । आजै उनीहरुलाई नेवारी बाजागाजा र परम्परासहित काठमाडौंमा भव्य स्वागत गरिएको थियो ।
विश्वको सर्वोच्च शिखरमा विवाह गरेर नौलो कीर्तिमान राख्ने यी जोडीको दाम्पत्य जीवन सुखी रहोस् मेरो पनि शुभकामना ।

No related posts.