अमेरिकी राजदूतको कडा टिप्पणी

२०६२ साउन २५ मंगलबार
सरकारका माइक अर्थात् प्रवक्ताले आन्तरिक मामलामा बढी भएर बोल्ने हैन है भनेर बेलायती राजदूतलाई देश निकाला हुनसक्ने चेतावनी दिएको दुई दिन पनि बित्न नपाउँदै अमेरिकी राजदूत जेम्स एफ मोरिआर्टीले आज सरकारको विरोधमा कडा टिप्पणी गर्नुभएको छ। नेपाल-अमेरिका सम्बन्धका बारेमा आज राजधानीमा आयोजित संवाद कार्यक्रममा उहाँले गर्नुभएको भाषणको प्रमुख अंशका लागि भित्र आउनुहोला।
- आज नेपाल संकटको चौबाटोमा उभिएको छ। दरबार र राजनीतिक पार्टीहरुबीचको बढ्दो दूरीले माअ‍ोवादी र उनीहरुको नेपाललाई क्रुर र पुरातन राज्यमा बदल्ने योजनालाई मात्रै सहयोग पुर्‍याउनेछ।

- १२ वर्षको तपाईँहरुको सक्रिय प्रजातन्त्रको क्रममा नेपालले गर्वलायक निकै उपलब्धि हासिल गरेको छ। साक्षरता दर बढेको छ, सडक बनेका छन्, विकास तीव्र भए, वैदेशिक रोजगार बढे र जनताले निर्वाचनबाट आफ्ना मत जाहेर गरे। नयाँ प्रजातन्त्र यद्यपि शान्त समुद्रमा कहिल्यै सफर गर्दैन। हो, भ्रष्टाचार भए, र अनिश्चित नीति र गडबडी भयो राजनीतिक संस्थाहरुमा। तर यसो त सबै नयाँ प्रजातन्त्रमा हुन्छ। मेरो आफ्नै देशमा पनि प्रजातन्त्रका केही दशकमा त्यस्तो भयो।

- माअ‍ोवादीहरु पनि एक दिन राजनीतिक मूलधारमा आउनेछन् र हतियार त्याग्नेछन् भन्ने आशा हामी राख्छौं। तर हालका लागि उनीहरुकै शब्द र व्यवहारले अर्कै बताउँछन्। उनीहरु सामूहिक खेती चाहन्छन्- जुन व्यापक भोकमरीको कारण बन्नेछ। उनीहरु वर्गशत्रुलाई पुनः शिक्षा दिन चाहन्छन्- जुन शिक्षित र स्वतन्त्र विचार राख्ने मानिसहरुलाई सखाप पार्ने योजना हो। उनीहरु आफ्नो क्रान्ति आयात गर्न चाहन्छन्- जसले पूरै दक्षिण एसियालाई खतरामा पार्नेछ। हामीले कहिले पनि भुल्नु हुँदैन कि हामी त्यस्तो विचारधारासित डिल गर्दैछौं जुन सबैको सम्बन्ध हिंसासित छ- स्टालिन, माअ‍ो र पोल पोट।

- माअ‍ोवादीहरुले आफू परिवर्तनका लागि तयार भएको संकेत देखाउन केही गरेका छैनन् र उनीहरु प्रजातन्त्रप्रति प्रतिवध्द पनि छैनन्। उनीहरुको कामकारबाहीले उनीहरुको बोली भन्दा चर्को स्वरमा उनीहरुको व्यवहार देखाउँछ। हामी नबिर्सौंऽ माअ‍ोवादीहरुले सन् १९९९ देखि शक्ति प्रयोग गरेर र प्रयोग गर्ने धम्की दिएर निर्वाचन रोक्ने प्रयास गर्दै आएका छन्। र निर्वाचनको अभावमा प्रजातन्त्र सक्रिय हुनसक्दैन।

- कुनै पार्टीको अक्षमताको अर्थ नेपालमा प्रजातन्त्रले काम गर्न सक्दैन भन्ने हुँदैन।

- प्रष्ट रुपमा माघ १९ को कदम प्रजातन्त्रका लागि ठूलो आघात हो। अप्रिल र मेमा अधिकांश राजनीतिक बन्दीहरु रिहा गरेर र अ‍ौपचारिक रुपमा संकटकालको अन्त्य गरेर केही प्रगति देखिएको थियो। तर त्यसबेलादेखि अहिलेसम्म सरकार आफैले घोषणा गरेको बहुदलीय प्रजातन्त्रको उद्देश्यप्रति कमै मात्र कारबाही भएको हामीले देखेका छौं। कागजमा सरकारको चार बुँदे योजना प्रशंसायोग्य छ जसमा भ्रष्टाचार हटाउने, आतंकवाद निर्मूल पार्ने, आर्थिक अनुशासन कायम राख्ने र सुशासनको आश्वासन थिए।

-

माघ १९ को प्रत्यक्ष शासनपछिका छ महिनामा अभियोग प्रमाणित भएका अपराधीसहित पञ्चायती नेताहरुको प्रश्नवाचक मन्त्रिमण्डलसहित सरकार आफ्नै सिध्दान्तबाट विचलित भएको देखिन्छ। यदि दरबार प्रजातन्त्रप्रतिको आफ्नो प्रतिवध्दताप्रति गम्भीर छ भने उसले शब्द र व्यवहार दुवैबाट त्यसलाई देखाउनु पर्छ।

भाषणको पूर्ण विवरण यहाँ छ।

No related posts.