आज ठूलो विरोध प्रदर्शनको तयारी

२०६२ भदौ २८, मंगलबार

शायद टाउकोमा बज्रिएको यही लाठीका कारण गिरिजा राजधानी केन्द्रित आन्दोलनको पहिलो दिन भदौ १९ गते विशाल बजार अगाडि बेहोस भएका थिए। केही दिनको उपचारपछि हाल उनी स्वस्थ भएको र आज जुलुसको नेतृत्व गर्ने तयारी गरिरहेको बुझिएको छ। तस्वीर साभारः आउटलुक इन्डिया

हिजो एक दिन आराम लिएका सात दलले आज अपराह्न साढे ३ बजे रत्नपार्क केन्द्रित आन्दोलन गर्ने तयारी गरिरहेका छन्। आजको जुलुसमा गिरिजा, माधव नेपाल लगायत सातै दलका शीर्ष नेताहरुको उपस्थिति हुने भनिएकोले पनि आकर्षण बढेको छ। हिजो महेन्द्ररत्न क्याम्पस, ताहाचलअगाडि विद्यार्थीहरुको प्रदर्शनका क्रममा सेनाले हवाई फायर गरेका कारण पनि विद्यार्थीहरु उत्तेजित भएका छन्। आज ठूलो संख्यामा विद्यार्थी, युवा र कार्यकर्ताहरुले प्रदर्शनमा भाग लिने भनिएको छ। भन्न त खुल्लामञ्च कब्जा गरेर आमसभा गर्ने पनि भनिएको छ। तर नेताहरुले सहजै गिरफ्तारी दिने, अनि बाँकीलाई अश्रुग्यास, पानीको फोहोरा र लाठिचार्ज गरेर भगाउने स्थिति आज पनि दोहोरिन सक्छ।

आज हवाई फायर भयो वा गोली नै चल्यो भने आन्दोलन चर्किन सक्छ। तर मलाई लाग्दैन त्यस्तो केही हुनेछ। केही भएन भने आन्दोलन शिथिल हुँदै जाने खतरा छँदैछ। त्यसैले हेरौं, आज दलहरुले कस्तो रणनीति लिनेछन् म शायद् आजको कार्यक्रम हेर्न जान्छु होला। यसबारेमा तपाईँहरुलाई अपडेट गर्ने नै छु।

No related posts.