सञ्चार सम्पर्क विच्छेद, दिउँसै कर्फ‌्यु

२०६२ चैत २६, शनिबार
(अपडेट ८३०) सबै मोबाइल सेवा बन्द छन्। नेपाल टेलिकमको प्रिपेड र पोस्टपेड दुवै बन्द भएका छन्। मेरो मोबाइलको सेवा केही समय खुला भए पनि अहिले बन्द भएका छन्। ल्यान्डलाइन भने सुचारु छन् अहिलेसम्म।

आम हडतालको तेस्रो दिन दलहरुले जन प्रदर्शन गर्न लागेका बेला आज बिहान सबेरैबाट सञ्चार सम्पर्क आंशिक रुपमा विच्छेद गरिएको छ। ल्यान्डलाइन फोन चले पनि नेपाल टेलिकमको प्रिपेड मोबाइल बन्द गरिएको छ। निजी क्षेत्रको मेरो मोबाइल भने काटिएको छैन।

त्यसैगरी आज बिहान १० बजेदेखि राति ९ बजेसम्म कर्फ्यु लगाइएको एक जना साथीले भनेका छन्। म नेपाल टेलिभिजन हेर्दैछु, त्यसमा राजाको भाषण आउँदैछ, हिजोको। कर्फ्युको सूचनाका बारेमा त्यसमा केही छैन अहिलेसम्म। म एकछिन बाहिर घुमेर आउँदैछु।

कर्फ्यु आदेश काठमाडौंको चक्रपथ क्षेत्रभित्र र ललितपुर भक्तपुर र कीर्तिपुरका केही क्षेत्रहरुमा बिहान १० बजेदेखि लगातार राति ९ बजेसम्म लागू हुने भनिएको छ। यो कर्फ्यु आदेश अर्को सूचना जारी नभएसम्म लागू हुने भनिएको छ। अहिले भर्खरै म काठमाडौंका केही स्थान घुमेर आएको थिएँ।

बाटोमा एकदमै भीड छ। कर्फ्युको सूचना धेरैले पाइसकेका छन्। नपाउनेहरु पनि हो र भन्दै अरुका मुखबाट खबर सुन्दैछन्।

हनुमानढोका जिल्ला प्रहरी कार्यालय अगाडि सयौंको भीड लागेको छ। तर त्यो भीड धार्मिक प्रयोजनका लागि हो। मच्छिन्द्रनाथको रथ त्यहाँ राखिएको हुनाले र केही क्षणपछि कर्फ्यु लाग्ने हुनाले त्यहाँ भीड भएको हुनसक्छ।

बसन्तपुरदेखि असनसम्म एकदमै भीड छ। मानिसहरु किनमेल गर्न निस्केका छन्। कतै प्रदर्शन भने देखिन। दलहरुले कर्फ्यु तोडेर पनि प्रदर्शन गर्ने बताइ आएका थिए। त्यसैले आजको स्थिति के हुन्छ यसै भन्न सकिन्न।

सहयोगको अपीलः
मेरो केबुल नेटको तार हिजोको आगलागीमा चुँडिएको हुनाले म महँगो डायल अप सेवा चलाउन बाध्य भएको छु। असहज परिस्थितिमा देशका ताजा खबर तपाईँहरुलाई पुर्‍याउन म निरन्तर अपडेट गरिरहनेछु। इन्टरनेटको पासवर्ड त एक जना साथीको चोरेको छु तर फोनको खर्चको भार भने मलाई थेग्न गार्‍हो हुनेछ। कृपया सक्दो सहयोग गरी यो भारलाई कम गरिदिन अपील छ। तपाईँको स्पोन्सरसिपले हजारौं पाठक लाभान्वित हुनेछन्। सहयोगका लागि माथि बायाँ छेउमा रहेको पेपाल बटनको प्रयोग गर्न सक्नुहुनेछ।

No related posts.