आज सरस्वती पूजा, बसन्त पञ्चमि, श्रीपञ्चमि। स्कूले जीवनमा यो पर्वको महत्त्व नै बेग्लै हुन्थ्यो। घरनजिकैको मन्दिरमा पूजा गर्न जान्थ्यौँ। त्यहाँको सरस्वती मन्दिरमा चकले आफ्नो नाम लेख्‍थे मानिसहरु। मैले पनि आजभोलिका मान्छेहरुले बोक्ने आइप्याड जत्रो कालो सिलोटमा सेतो चकले कोरेर पहिलो पटक अक्षर लेखेको अलिअलि सम्झना छ। कहिलेकाहीँ हामी स्वयम्भूको मञ्जुश्री मन्दिरमा पनि पुग्थ्यौँ। त्यहाँ पनि ठूलै भीड हुन्थ्यो मानिसहरुको।

माता सरस्वतीको प्रशंसा गरिएको मन्त्र ‘या कुन्देन्तुसारहार धवला…’ सानोमा कण्ठ थियो। संस्कृतको मन्त्र मात्रै कण्ठ थियो, अर्थ भने थाहा थिएन। मन्त्रको अन्त्यतिर ‘निःशेषजाड्यापहा’ भन्नुपर्थ्यो, मलाई चाहिँ ‘जड्याहा’ भने जस्तो मात्र लाग्थ्यो। ‘जड्ता अन्त गर’ भनेको रहेछ खासमा। तर त्यो उमेरमा जड्ताको अर्थ के थाहा हुनु। सँधै सतर्क, अलर्ट रहन सकौँ भनेको हो भनेर कसैले सिकाएन, धेरै पछि मात्र थाहा भयो। धन्न, सरस्वतीको पूजा गर्दैमा पास होइन्छ भन्ने चाहिँ मनमा कहिल्यै पनि आएन, त्यसरी कसैले पनि सिकाएन। बरु सरस्वतीको स्मरणले आत्मविश्वास भने बढ्थ्यो। संस्कृतका मन्त्रहरुलाई कसैले जतिसुकै आलोचना गरुन्, मलाई भने ती मन्त्रहरु उच्चारण गर्दा ध्वनिमा हुने कम्पनमा केही न केही शक्ति छ भन्ने अझै पनि लाग्छ। पश्चिमी ज्ञानमा बढी जोड दिइएकोले पूर्वीय ज्ञान पछि नै पर्‍यो। संस्कृतमा लेखिएका परम्परागत ज्ञानहरु पाउन हामी वञ्चित रह्यौँ। परम्पराका नाममा फलानो दिनमा फलानो ठाउँमा स्नान गरे सात जुनीको पाप कट्छ भन्ने वाहियात ज्ञानमात्रै हामीलाई दिइयो। Continue reading जय सरस्वती माता !

अन्ततः सरकारले आज पेट्रोलियम पदार्थको भाउ केही घटाउने निर्णय गर्‍यो। भाउ नघटाउने अडान राख्दै आएको सरकारले आज प्रति लिटर पेट्रोलमा ३, डिजेल र मट्टितेलमा ४ तथा ग्यास प्रति सिलिण्डर ८५ रुपियाँ घटाउने बताएको हो। सरकारको अपरिपक्वता यसमा देखियो। एकै पटक त्यसरी ड्याम्मै पेट्रोलमा लिटरको १० रुपियाँ, मट्टितेल र डिजेलमा नौ रुपियाँ अनि ग्यासमा १७५ रुपियाँ बढाउनु हुन्थेन। मेरो लोकप्रिय सरकार छ, मैले जे गर्दा पनि हुन्छ भन्ने सोच त नहुनुपर्ने हो। भाउ बढेपछि विरोध हुन्छ भन्ने त थाहा हुनै पर्ने हो। बिस्तारै महिनामा एक/दुई रुपियाँ गरी बढाएको भए यति ठूलो आक्रोश हुने थिएन। आखिर माघ ४ गते गरेको भाउ बढाउने निर्णय एक साता पनि नबित्दै फिर्ता लिन बाध्य हुनुपर्‍यो।

तर भाउ घट्नु मात्रै समस्याको समाधान हैन। भाउमात्र घटेको हो, कमिसनखोरी र भ्रष्टाचारको जालो घटेको वा हटेको छैन। त्यसैले आयल निगमको घाटा बढाएको थियो। अब फेरि यस्तै हो। पेट्रोल पम्पवालाहरुले अब महँगोमा किनेको तेल सस्तोमा बेच्दिनँ भनेर बस्नेछन्। अस्ति नै सस्तोमा किनेर महँगोमा बेचेर नाफा कुम्ल्याएको चाहिँ उनीहरुले चटक्कै बिर्सनेछन्। फेरि अभाव चर्काइनेछ। फेरि सास्ती उपभोक्तालाई नै दिइनेछ। कमिसनखोरी भ्रष्टाचार घटाउने हो भने योभन्दा सस्तोमा तेल दिन पुग्थ्यो। तर तेहोरो तेहोरो कर लिने अनि विकास बजेटबाट अनुदान दिनुपर्छ भन्दै कराउने क्रम अझै जारी रहने हो भने ठूलो अभाव सिर्जना हुनेछ। विद्यार्थीहरु अब अझै भाउ घटाउनु पर्छ भन्नेमा हैन आयल निगमको विकृति र तेहोरो कर लिने सरकारी नीति हटाउन केन्द्रित भइदिए भाउ स्वतः घट्थ्यो। कस्तो छ आयल निगमभित्रको विकृति, आउनुस् केही बुझौँ। हेर्नुस् भित्र कसरी आयल निगमले ठगिरहेको छ उपभोक्ताहरुलाई र हामी लाचार बनेर सब सहिरहेका छौँ। Continue reading भाउ घटेर के गर्नु, त्यहाँको कमिसनखोरी र भ्रष्टाचार पो घटाउनु पर्थ्यो

१३ विद्यार्थी संगठन र नौ युवा संगठनले गरेको बन्दका क्रममा कालिमाटीमा गज्जबका दृश्य देखिए। हेर्नुस् त- सटर आधा खुलेका पसलहरु। बन्दको समर्थनमा आधा पसल बन्द गरेको भने पनि भयो, बन्दको विरोधमा आधा पसल खोलेको भने पनि भयो। यो एउटा मात्र हैन, अरु पनि पसल त्यस्तै थिए। थप फोटो भित्र

अन्ततः आज उपत्यका बन्द भयो। शिव सेना नेपालको दुई दिन, अयोग्य लडाकुको एक दिन र सुकुम्बासीहरुको एक दिन गरी लगातार तीन दिन बन्द असफल भएपछि काठमाडौँ उपत्यका अब कसैको घरको झ्यालढोका जस्तो जसले जतिबेला चाह्यो, उतिबेला बन्द नहुने रहेछ भन्ने देखिएको थियो। हामी दङ्ग पनि परेका थियौँ। तर यस पटक भने बन्द भयो। बन्दका आयोजक १३ विद्यार्थी तथा नौ युवा संगठन थिए। त्यसमा कङ्ग्रेसको नेविसंघ र तरुण दल, एमालेको अखिल र युवा संघ र सत्तामा रहेको माओवादीका अखिल क्रान्तिकारी र वाइसीएल पनि सहभागी थिए। भएभरका सबैले आह्वान गरेको बन्द भएका कारण शक्ति कै कारण पनि यो बन्द सफल भएको हुनुपर्छ।
Continue reading बन्दको यो समर्थन कि विरोध ?