यो साइटमा भएका सामाग्रीहरु व्यवसायिक प्रयोजनका लागि कुनै पनि हिसाबले टेक्स्ट, फोटो, अडियो वा भिडियोका रुपमा पुनर्उत्पादन गर्न स्वीकृति लिनुपर्नेछ। स्वीकृतिका लागि salokya@mysansar.com मा इमेल गर्नुहोला।
eXTReMe Tracker

कोरोना संक्रमित ४ सय नाघ्दा ३८ जिल्लामा फैलियो

कुरा कोरोनाको भए पनि सुरुमा नक्साको नै गरौँ। केहीलाई नयाँ नक्शा किन नराखेको भनेर कराउन मन लागिसक्यो होला। यसमा के बुझ्नुहोला भने अहिलेसम्म सरकारले नयाँ नक्शा सार्वजनिक गरेको छैन। अहिले सामाजिक सञ्जालमा जति नक्शा आएको छ, त्यो आधिकारिक होइन। भूमिसुधार मन्त्रीले नै आधिकारिक नभएको नक्शा प्रयोग नगर्न भनेकी छिन्। नेपालको नक्शा आधिकारिक रुपमा सरकारले सार्वजनिक गरेपछि बल्ल अरु निकायबाट पनि हुनेछ। माथिको नक्शा स्वास्थ्य मन्त्रालयको सिचुएसन रिपोर्टमा राखिएको हो। 

कोरोना संक्रमितको संख्या दिनप्रतिदिन बढ्ने क्रम जारी छ। हिजो ३ सयमा रहेको संख्या आज एक दिनमै ४ सय नाघेको छ। दक्षिण एसियाको ट्रेन्ड हेर्दा अब नेपालमा पनि एक हप्ता जतिमै १ हजारको संख्या पुग्न सक्छ। माथिको चार्टमा कुन देशमा कति दिनमा कति सयको संख्या पुग्यो देखाइएको छ। नेपालमा पहिलो केस भेटिएको १०६ दिनमा १०० संक्रमित पुगेको थियो भने त्यसको ५ दिनमा २०० पुगेको थियो। २०० पुगेको अर्को ५ दिनमा ३ सय पुग्यो भने त्यसको १ दिनमै ४ सय पुग्यो।

आज काठमाडौँ उपत्यकाका तीन सहरमध्ये काठमाडौँमा ३ जना भक्तपुरमा १ जना र ललितपुरमा एक जना संक्रमित भेटिए। ललितपुरमा पहिलो पटक संक्रमण भेटिएको हो। त्यसैगरी काभ्रे, रामेछाप, लमजुङ, सिन्धुली जिल्लामा पहिलो पटक कोरोना भेटिएको छ। हालसम्म कूल ३८ जिल्लामा संक्रमण भेटिएको छ। एउटा पनि संक्रमण नभेटिएका जिल्लाको संख्या ३९ छ। यसमा कतिपयले आफ्नो स्थायी ठेगानामात्र लेख्ने भएकोले हाल बसेको ठाउँ र संक्रमण भेटिएको जिल्ला फरक पनि पर्न सक्छ।

Comments