एउटा अनौठो खबर आयो- ६५ वर्षका एक झापालीले आत्महत्या गरेछन्। समाचार अनुसार माघ ८ मा संविधान जारी हुन्छ भनेर छिमेकीसँग बाजी ठोकेका थिए रे, नभएपछि विरक्तिएर आत्महत्या गरेको रे।

तपाईँले यसलाई कसरी लिनुभयो कुन्नि, मैले चाहिँ यसमा सबभन्दा बढी दोष उनको आफ्नै देखेँ। किनभने उनले नेताहरुको बोलीलाई विश्वास गरेका रहेछन्। नेता त जनता झुक्याउन जे पनि बोल्दै हिँड्छन् नि। अनि मिडियाको दोष देखेँ, जसले माघ ८ मा संविधान जारी हुन्छ जस्तो गरेर नेताहरुको भनाईलाई प्रचार प्रसार गरे। त्यही हेरेर, सुनेर, पढेर उनलाई लाग्यो- हो, हो, माघ ८ मा पक्कै संविधान जारी हुन्छ। संविधान कसरी बन्छ भन्ने सामान्य ज्ञानसमेत उनीजस्ता धेरैलाई छैन, यो मिडियाकै कारण भएको हो। बुझ्न नखोज्नु उनको दोष हो। बुझाउन नसक्नु नेता र मिडियाको दोष हो। मैले त असोज मसान्तमै लेखेको थिएँ- अझै माघ ८ मा संविधान आउँछ भन्ठान्नु हुन्छ तपाईँ? हामीले मंसिर मै लेखिसकेका थियौँ, चमत्कार भए पनि संविधान आउँदैन।

कम्तिमा २०६२/६३ को आन्दोलनका प्रमुख शक्तिहरुबीच सहमति भएको भए एक किसिमको अधुरो अपुरो सम्झौताको दस्तावेजसम्म आउन सक्थ्यो माघ ८ सम्म। स‍ंविधान त मरे पनि आउँदैन थियो।
Continue reading स‍ंविधान नबनेर आत्महत्या : नेता र मिडियाले लिएको ज्यान

संविधान सभाको बैठकमा सोमबार मध्यरात जे भयो, त्यो सबले थाहा पाइसके। देशविदेशमा रहेका लगभग सबै नेपालीले थाहा पाएको र टेलिभिजनका भिडियो र मिडियाका फोटोमा देखेको कुरा हो- एमाओवादी नेतृत्वको विपक्षी मोर्चाले तोडफोड गरे। घम्साघम्सी गरे। मिडियामा अर्को कुरा पनि आयो- एमाले अध्यक्ष केपी ओलीमाथि पनि ताकेर माइकले हानियो। ओली आफैले यो कुरा भनेका थिए। एउटा कुरा भने मिडियामा आउँदै आएन- त्यो दिन प्रधानमन्त्री सुशील कोइरालामाथि भएको हातपात। मिडियामा नआएको कुरा तैँले कसरी थाहा पाइस् भन्नुहोला। प्रधानमन्त्रीका प्रेस सल्लाहकारले हिजो राति पठाएको प्रेस विज्ञप्ति र ओलीले गरेको ट्विटमा यो कुरा उल्लेख छ। हेर्नुस् भित्र।
Continue reading बिचरा, हाम्रा प्रधानमन्त्री सुशील कोइराला

प्रमुख दलका शीर्ष नेताहरुबीच सहमति नभएपछि संविधान सभा स‍ंविधान बनाउने हैन, द्वन्द्व गर्ने ठाउँ बन्ने खतरा बढेको छ। यसको एक झलक मध्यरातमा देखियो। संविधानका अन्तर्वस्तुमा सहमति नभएपछि प्रक्रिया (प्रश्नावली समिति गठन) मा जान पनि सहमति नै आवश्यक हुने हुनाले त्यसको अभावमा मुठभेड निम्तिने खतराकाबीच दिउँसो १ बजेका लागि डाकिएको संविधान सभाको बैठक मध्यरात कटेपछि बस्दा तान्डव मच्चियो। झडप भयो। घाइते भए तीन जना मर्यादापालक। कुर्सी बजारिए, माइक फोरियो। धेरै समयदेखिको यथास्थितिले देशलाई सँधै अन्यौलमा नै पार्थ्यो। अब देश तीव्र ध्रुवीकरणमा गएर एउटा शक्ति कि वार कि पार हुने स्थितिमा पुग्ने देखिन्छ। अहिलेको संक्रमणकालीन स्थितिमा विन विनको स्थितिमा नै सहमतिमा लिनेदिने काम गरी सबैलाई स्वीकार्य संविधान बन्नुपर्ने हो। तर संविधान सभा १ मा माओवादीले बहुमतको दम्भ र संविधान सभा २ मा कांग्रेस एमालेले दुई तिहाईको दम्भ देखाउँदा यसो हुन सकिराखेको छैन। अब दुई पक्ष कि द्वन्द्वबाट थाकेर सहमतिमा आउनु पर्‍यो कि पेलेरै एक पक्षलाई पाखा लगाउनु पर्‍यो। यो बीचमा बिचरा हामी जनताले भने कतिञ्जेल दुःख पाउनु पर्ने हो कुन्नि। Continue reading संविधान सभामा द्वन्द्व