२०६२ असोज ९, आइतबार
आज पनि राजनीतिका समाचारहरु छन्। केही महत्त्वपूर्ण समाचार पनि छन्। माअोवादीको एकपक्षीय युध्दविरामका बीच सुरक्षा कारबाहीमा ८ माअोवादीको मृत्यु भएको खबर पनि छ। तर मलाई आज सबैभन्दा मुटु छुने समाचार भने यही भयो, अस्पताललाई बुझाउने पैसा नभएपछि एउटी सुत्केरी महिलाले दश दिनको शिशुलाई छोडेर पाटन अस्पतालको छतबाट हाम्फाली आत्महत्या गरेको।
यससम्बन्धमा च्यानल नेपालका सहकर्मी दीपक पाण्डे र चन्द्र विष्टले एउटा ज्यादै मन छुने रिपोर्ट बनाउनुभएको थियो। आज प्रसारित उक्त रिपोर्टको स्क्रिप्ट यहाँ जस्ताको तस्तै साभार गरेको हुँ-
चितवन जिल्लाको जुटपानी गाउँ विकास समितिकी २१ वर्षीया अमृता विश्वकर्माले सुत्केरी भएको नौ दिनको दिन गत शुक्रबार पाटन अस्पतालमा आत्महत्या गरिन्।
हेर्दै बोकुँ-बोकुँ लाग्ने यी शिशुले अब जीवनमा आफ्नो आमाको वात्सल्य पाउने छैनन्। यी शिशुलाई जन्माउन ललितपुरस्थित पाटन अस्पतालमा भर्ना भएकी आमा अमृता विश्वकर्माले गत शुक्रबार मध्यराति अस्पतालको छतबाट हामफालेर आत्महत्या गरेकी छिन्।
अबोध शिशुलाई छोडेर अमृताले आत्महत्या गर्नुको कारण थियो -चरम गरिबी। उपचार गर्दा लागेको खर्च अस्पताल व्यवस्थापनलाई बुझाउन नसकेपछि अमृताले मध्यराति अस्पतालको यही स्थानबाट हाम्फालेको उनका आफन्तहरुले बताएका छन्।
अमृताका आफन्तहरुले सुत्केरी महिलाले आत्महत्या गर्नुमा अस्पताल व्यवस्थापन जिम्मेवार रहेको आरोप पनि लगाएका छन्।
एक वर्षअघि मात्र चितवन निवासी हरि विश्वकर्मा र अमृताबीच विवाह भएको थियो। यसैबीचमा गर्भवती भएकी अमृतालाई डेलिभरी गराउन भदौ २४ गते पाटन अस्पताल लगियो र २७ गते बच्चा पनि जन्मियो।
बच्चा राम्रोसँग जन्मिएको भएपनि काठमाडौंमा मजदुरी गरेर जीवन निर्वाह गर्दै आएको विश्वकर्मा परिवारमा अस्पताललाई तिर्ने पैसा थिएन। अस्पताल भर्ना गरेको ९ दिनमै १२ हजार रुपैयाँ अस्पताललाई तिर्नुपर्ने भइसकेको थियो।
अस्पताललाई तिर्ने पैसा नभएपछि आफन्तहरुलाई श्रीमती हेरिदिन लगाएर अमृताका श्रीमान हरि विश्वकर्मा पैसा खोज्न घरतिर लागे। यसैबीचमा छोरालाई इन्जेक्सन लगाउन थप रुपैयाँ लाग्ने भन्दै त्यो रकम जुटाउन अस्पतालले अमृतालाई दबाब दियो।
त्यही पीडा सहन नसकेर अमृताले आत्महत्या गरेको आफन्तहरु बताउँछन्।
यसबारेमा पाटन अस्पतालका अधिकारीहरुसँग सम्पर्क राख्न खोज्दा उनीहरु सम्पर्कमा आउन चाहेनन्।