मेरो नेपाल प्यारो नेपाल

नयाँ वर्षदेखि माइसंसारले यो नयाँ स्तम्भ सुरु गरेको हो। हरेक साता अब हामी राष्ट्रियता झल्कने एउटा सामाग्री राख्‍नेछौँ। भौगोलिक सीमाको बन्धनबाट मुक्त भएर संसारका जुनसुकै स्थानमा बसे पनि हामी सबै नेपालीलाई राष्ट्रियताको एउटै सूत्रले बाँधेर राखेको हुन्छ। यो दिन हामी राष्ट्रियता जगाउने छौँ। देशलाई सम्झनेछौँ। राष्ट्रियता सम्पूर्ण नेपालीको पहिचान हो। कसैकसैले कमेन्टमा झण्डा बोकेर फोटो खिचेर राष्ट्रियता देखाउने नाटक गर्‍यो भन्दै नकारात्मक कमेन्ट पनि गर्ने गरेका छन्। ल मानौँ, नाटक नै गरे रे। के बिग्रियो त ? एक क्षण कै लागि भए पनि नेपाली झण्डा बोकेर फोटो खिचेर राष्ट्रियता प्रचार अभियानमा सहभागी भए त कसलाई हानी भयो ? झण्डा फेर्ने वाहियात बहसमा लागेकाहरुलाई हामीलाई हाम्रै झण्डा प्यारो लाग्छ भनी देखाउने यो एउटा अभियान पनि हुनेछ। त्यसैले त्यस्ता कमेन्टलाई बेवास्ता गर्दै निर्धक्क आफ्नो फोटो पठाउनुस्। यो स्तम्भमा हामी एउटा राष्ट्रिय भावना जगाउने गीत र फोटोहरु राख्‍नेछौँ। फोटो तपाईँहरुले पठाउनु पर्नेछ। देशबाट टाढा रहँदा देशको माया झल्काउने कुन चिज तपाईँले आफ्नो कोठामा राख्‍नुभएको छ ? आफू पढ्ने विश्वविद्यालयमा राख्‍नुभएको छ। तपाईँको कोठामा झुण्डिएको चन्द्रसूर्य अंकित राष्ट्रिय झण्डा होस् वा तपाईँको नोटबुकमा टाँसिएको नेपाल अंकित स्टिकर वा तपाईँको नेपाल लेखिएको टिसर्ट। [email protected] मा विवरणसहित पठाउनुस् र राष्ट्रियताको भावना जगाउन सहायक बन्नुस्।

हामी यो स्तम्भबाट ठूलो परिवर्तन हुने आशा राख्दैनौँ। हामी त देशविदेशका नेपालीको मनको कुनामा रहेको राष्ट्रियताको भावनालाई फैलाउने सामान्य माध्यम बन्न खोज्दैछौँ।

तपाईँहरुले पठाएका फोटोहरु क्रमशः राख्‍दै जानेछौँ, थप फोटोहरु पठाउँदै गर्नुहोला। फोटो साथै राष्ट्रियता जगाउने संस्मरण, अनुभूति पनि लेखेर पठाउन सक्नुहुन्छ। राष्ट्रगान वा राष्ट्रिय गीत गाएर त्यसको भिडियो युट्युबमा अपलोड गरी माथि कै इमेलमा पठाउनु भए पनि हुन्छ।

बेलायतमा पनि रोधी घर
नेपाली संस्कृति विदेशमा पनि हेर्न पाइने भएको छ। नेपाली संस्कृतिलाई बेलायतमा व्यवसायिक रुपमा उपयोग गर्ने जमर्को गरेका छन् नेपालमा निरमाया रोधीघरका संस्थापक व्यवसायी रमेशबाबु श्रेष्ठले। अक्टोबर १५ तारिखदेखि सुरु भएको यो रोधी घरमा विशुद्ध नेपाली पाराले ठेट नेपाली परिकारहरु पनि पस्कने उनले बताएका छन्। हेरौँ केही फोटोहरु-

नेपाली पहिरनमा परिचारिका।

नेपाली कपडासहितको सजावट।

फिनल्यान्डको Riihimäकि मा अध्ययनरत नेपालीहरुले मनाएको तिहार। फोटोः गोविन्द आचार्य

कोरियामा मनाइएको तिहार
-नवीन गौतम-
देशको पहिचान र माया कोरा राष्ट्रवादमा हुँदैन। न त केबल भौगोलिक सिमानाको मायाको रटान लगाएर नै हुन्छ। देशको माया भनेको जनताको माया हो, यहाँका भाषा, भेष, कला, सँस्कृतिको माया हो। चाहे स्वदेशमा रहेर होस्, चाहे विदेशमा रहेर होस् देशको कला र सँस्कृतिको सम्मान गर्न सकिएमा देशको माया झल्किन्छ, साथसाथै राष्ट्रियताको मजबुतीकरण पनि हुनजान्छ। प्रत्येक नागरिक देशका अवैतानिक राजदुत हुन भन्ने कुरा प्रत्येक नागरिकले बुझेमा विदेशमा देशको बारेमा सकारात्मक सन्देश निश्चित रुपमा जान सक्छ। राष्ट्रको प्रतिष्ठामा सबै जनताको सम्मान लुकेको हुन्छ। तसर्थ सबैले आ-आफ्नो ठाऊँबाट आफ्नो राष्ट्रलाई चिनाउने प्रयत्न हुनु पर्छ।

विदेशमा रहेर पनि धेरै साथीहरुले नेपालको प्रतिनिधित्व गर्दै उचित फोरमहरुमा आफ्नो कला र सँस्कृतिको प्रदर्शन गर्दै आउनु भएको छ। यसपालीको तिहारको समयमा दक्षिण कोरियाको ख्वाङ्जु सहरमा “चुङ्जाङ्न्यो” महोत्सवको आयोजना भएको थियो। उक्त महोत्सवमा कोरियाली कलाकारहरुका साथसाथै विभिन्न विदेशी कलाकारहरुले आफ्नो कला र सँस्कृतिको प्रदर्शन गरेका थिए।

त्यस्तै ख्वाङ्जुस्थित चोसन विश्वविद्यालयमा अध्यनरत नेपाली विद्यार्थीहरुले पनि उक्त महोत्सवमा आफ्नो कला र सँस्कृतिको प्रदर्शन गर्नु भएको थियो। छोटो तयारीका बाबजुत् उक्त प्रदर्शनहरुलाई धेरै कोरियाली र विदेशीहरुले उत्साहका साथ अवलोकन गरेका थिए। नेपाली विद्यार्थीहरुको गाना र नृत्यमा दर्शकहरुले सँगसँगै नाचेर वहाँहरुको मेहेनत सार्थक भएको प्रमाण दिएका थिए। नृत्य र गीतहरुको प्रस्तुतिमा देखिएका भादगाउँले टोपी र नेपाली झण्डाले वातावरणलाई नेपालीमय बनाईदिएको थियो।