देश संघीयता, शासकीय स्वरुप जस्ता जटिल मुद्दाका बहसमा प्रवेश गरिरहेको बेला यस्तै विषयलाई समेटेर तयार पारिएको कान्तिपुर टेलिभिजनबाट हिजो प्रसारित विजयकुमारको दिशानिर्देश कार्यक्रम भने एउटा फरक कारणले अहिले चर्चामा रहेको छ। विजयकुमारका प्रश्न, कार्यक्रममा उठेका मुद्दाका कारण हैन, कार्यक्रमको क्रममा प्रस्तोताको मोबाइलको रिङ बजेको कारण सोसल मिडियामा चर्चा चुलिएको हो। आउनुस् हेरौँ कस्तो चर्चा भइरहेको छ र आखिर कुरा के रहेछ, भिडियोसहित।
लाइभ कार्यक्रममा त्यसरी बजेको भए त ब्लन्डर भनिन्थ्यो भने यो त रेकर्डेड कार्यक्रम। एडिट गरेर नफ्याँकी यो जस्ताको तस्तै राख्न कुनै जरुरी थिएन भनेर कोही भन्दैछन् त कोही अतिथि र दर्शकको अपमान गरिएको बताउँदैछन्।
हुन पनि उनले अन्तर्वार्ताका लागि बोलाएका अतिथि मिनेन्द्र रिजाल उनले फोन उठाइरहँदा टाउको झुकाएर बसिरहेका थिए।
विजयकुमारले आफ्नो फेसबुक पेजमा यो घटना दुर्घटनावश (एक्सिडेन्टल) भएको बताएका छन्। तर रेकर्डेड कार्यक्रममा यस्तो गर्न किन जरुरी भयो भन्ने प्रश्नको जवाफ भने दिएका छैनन्। उनले मोबाइल फोन अफ गर्न बिर्सेको स्पष्टिकरण दिएका छन्।
कान्तिपुर टेलिभिजन मै लामो समय कार्यरत दीपक भट्टराईले त्यही फेसबुक पेजमा भनेका छन्- टेलिभिजन ‘टक सो’ का निश्चित मर्यादा हुन्छन्। जति नै सर्वज्ञाता प्रस्तोता हुन् तिनले दर्शकलाई सम्मान गर्न छाड्नहुँदैन। उनले ट्विटरमा लेखेका छन्- अनुभवी प्रस्तोता विजयकुमार र प्रोड्युसर भुषण दाहालले निर्माण गरेको कार्यक्रममा दर्शकलाई यतिसम्म हेपिन्छ भन्ने सोचेको थिइनँ।
अनन्त कोइरालाले आफ्नो ब्लगमा विजयकुमारलाई खुला पत्र लेखेका छन्- मान र मर्यादा तथा नैतिकताका ठूला ठूला दृष्टान्त तपाईंका कलम र बोलीबाट बारम्बार प्रष्फूटित भएका छन् र भविश्यमा पनि हुनेछन्। तर कृपा गरेर तपाईंहरूले आफ्नो नैतिकता र अरूलाई गर्नुपर्ने मर्यादाका बारेमा कहिल्यै सोच्नुभएको छ? यदि थियो भने अवश्यपनि तपाईंले आफ्नै कार्यक्रमको अतिथिका अगाडि अन्तर्वार्ताकै क्रममा फोन उठाएर संवाद गर्नुहुन्थेन होला।
आखिर के हो त कुरा ? भिडियो हेर्नुस्-
यो रेकर्डेड कार्यक्रम भए पनि लाइभ न्युज टेलिकास्टका क्रममा भने यस्ता थुप्रै घटना हुन्छन्। चलाखिपूर्वक उनीहरुले यसलाई सहज रुपमा प्रस्तुत गर्ने प्रयास गरे पनि यसलाई ब्लन्डर नै मानिन्छ। एउटा उदाहरण हेर्नुस् यहाँ क्लिक गरी।
अर्को भिडियो हेर्नुस्-
यसमा भने अतिथिको मोबाइल बज्छ-
विजय कुमारले कार्यक्रममा फोन अन राखेर गल्ती गरेका थिए। तर त्यो गल्तीलाई एडिट गरेर सजिलै हटाउन सकिन्थ्यो। रेकर्डेड कार्यक्रममा यस्तै गल्तीहरु हटाउनलाई एडिटर राखिएको हुन्छ। तपाइँहामीले पर्दामा देख्ने भन्दा धेरै कुरा पर्दापछाडि भएका हुन्छन्। त्यसलाई हटाएपछि मात्रै त्यो रुपमा टेलिभिजनमा हेर्न हामी पाउँछौँ। तर अनौपचारिक हुने नाममा यो टेलिफोन वार्तालाई जस्तातस्तै राखिएको हो। न उनका समर्थकहरुले भने जस्तै यो साहसी काम हो न उनका आलोचकहरुले भने जस्तै यो दर्शकको अपमान र घमण्ड हो। मैले बुझे अनुसार उनी अध्यात्ममा धेरै भिज्दै गइरहेका छन्। उनको लागि प्रशंसा र निन्दाले कुनै अर्थ राख्दैन। यो एउटा घटनाले म उनको कार्यक्रम हेर्नबाट पछि हट्दिनँ।
ट्विटरमा यो प्रकरणमा चलेको बहसलाई कृष्ण गुरागाइँले क्युरेट गरेका छन्-
